LAOAG CITY – Inarak dagiti umili ti maysa a flower shop ita a bisperas ti Valentine’s Day.
Segun ken ni Ms. Joan Cadoy, Manager ti maysa kadagiti flower shop iti Laoag City Public Market and Commercial Complex, sipod idi Pebrero 9 agingga ita nga aldaw a bisperas ti aldaw dagiti puso ket agtultuloy nga adu ti maaw-awatda nga order manipud kadagiti kostumerda.
Inbatadna a ti kangrunaan nga order-da kadakuada ket dagiti nagduduma a klase ti sabsabong kas ti rosas nga isagutda kadagiti karelasion, pagayam ken dagiti ay-ayatenda iti biag.
Inlawlawagna a saan a maliklikan nga adda ti panaggaraw ti presio dagiti ilaklakoda a sabsabong gapu ta ipangina met ti supplier dagitoy.
Mainaig iti daytoy, inpakaammo ni Ms. Cadoy nga adu pay ti nagpareserba kadakuada nga order rason a kasapulanda ti ag-overtime tapno maaramid ken maileppas latta dagitoy.
Nupay kasta, inpasingkedna nga ikarigatanda nga akomodaren dagiti kustomerda nga ag-walk in wenno ag-order babaen ti online.
Innayonna a mangididiayada ti special package kas ti bouquet nga adda pay ti pasurotna a teddy bear ken cake nga agbalor ti P2,950, P5,850 ken P7,070.
Kabayatanna, naammoan a dagiti sabsabong nga ilaklakoda ket aggapu idiay Baguio City ken Manila.
