LAOAG CITY – Nangiyuswat a dagus iti imbestigasyon ni Police major Rommel Ramos, hepe ti PNP-Traffic Division ditoy ciudad ti Laoag kontra ken ni Police Corporal Melmar Antonio kalpasan a nagreklamo ti Bombo Radyo Laoag.
Immuna ti daytoy, nagturong ti team ti Bombo Radyo iti PNP-Traffic Division, alas-kwatro itay parbangon tapno mangala ti report ken update kadagiti napasamak nga insidente ti nasao a ciudad.
Nupay kasta, awan ti tao iti PNP-Traffic Division ken naamoan a ti nakaduty ket ni Antonio.
Inbatad ni Ramos a basar ti palawag ni Antonio ket napan iti tiendaan itay parbangon, ngem saanna nga inawat isut gapuna nga inbilin na ti naan-anay a panagpalawag ti maseknan.
Inpetteng ni Ramos a saan a mabalin a basta lattan pinanawan ni Antonio ti pwesto na ken masapol nga adda latta ti tao iti Traffic Division tapno adda ti mangsango kadagiti mapan agreklamo wenno matawagan no adda ti mapasamak nga insidente.
Inpasingked ni Ramos a kataripnong na dagiti tao na tapno saanen a maulit ti napasamak.
Maipalagip a saan laeng a daytoy ti kaunaan a gundaway nga awan ti nadanon ti Bombo Radyo a tao iti Traffic Division ngem ita laeng a naitured na ti nagreklamo.
