LAOAG CITY – Naidanog ti bato iti rupa ti maysa a baro babaen iti kapitan iti Barangay Lipay iti ili ti Solsona.
Nabigbig ti biktima a ni Froilan Mark Racca, agtawen ti 29 idinto a ti suspek ket ni Barangay Chairman Rogie Dancel, agtawen ti 55, naasawaaan ken agpada a residente iti nasao a barangay.
Segun met kenni Jofel Jamias, agtawen ti 47, naasawaan ken residente met laeng iti nasao a barangay, agirikep da kuman iti tianggi a kukua ti kabsat ti suspek idi nangeg na nga adda ti nagbakal rason a rimuar ken ditoy a nakita na ti kapitan.
Inbatad na a linapdan na ti kapitan a sumrek iti pwesto da ngem indurduron ti kapitan ti babai agingga a saan na a kabaelanen ken nakastrek ti suspek ken rumrumuar nga insublat na ti kaanakan na nga adda iti uneg ken insawang na ti “lastog kayo, awan babain yo”.
Gapo iti daytoy ket nagpatulong iti kagawad agingga a nagawid da ngem nabati da ti tulbek ti pagtaengan da ngem saan da a makasubli iti mismo a pwesto gapo ta sinerraan da ti kapitan daytoy.
Kunana a gapo iti daytoy ket intext ti kaanakan na a babai ti kabsat na a ni Froilan tapno isu ti mapan mangala iti tulbek ken idi nagkita da iti suspek ket dinamag ti biktima no anya ti problema ti kapitan agingga a ngimmato ti boses ni Dancel ken naggubal dagitoy.
Inpetteng na a nakita da ti panangidanog ti kapitan ti bato iti biktima rason a naitaray iti Solsona Rural Health Unit para iti pannakataming na ngem naiyakar iti Gov. Roque Ablan Senior Memorial Hospital.
Kuna ni Jamias a saan a daytoy ti damo a nagprobokar ti kapitan ngem saan da idi nga inrepreport.
Mainaig iti daytoy, inbatad ni Jamias a mabalin a saan a kayat ti kapitan nga isuna ti mangimanehir iti pwesto ti kabsat na nga adda iti Amerika.
Kabayatanna, desidido met ti pamilya ti biktima a mangipila ti reklamo kontra iti kapitan.
Iti agdama, nagtalinaed ti kapitan iti kustudoyar ti Philippine National Police ken maisagsaganan dagiti kasapulan a dokumento para iti pannakaipila ti kaso.
