LAOAG CITY – Inadmitir ni Mr. Manuel Dumrique iti Barangay Zamboanga ditoy ciudad ti Laoag a minalo na babaen iti kayo ti ipil-ipil ti pada na a senior citizen a ni Mr. Emilio Utleg.
Segun kenni Dumrique, daytoy ket gapo pay laeng iti datin a saan da a nagkinnaawatan da ken nadegdegan gapo iti maipagarop a panagtantanabutob ni Utleg idi limmabas bayat nga agburburas ti sabing ti karabasa ni Dumrique.
Gapo iti daytoy, kinamat na ti nakabisikleta a ni Utleg ken induron na a rason ti pannakatulid daytoy, ken ditoyen nga innala na ti kayo a kanayon nga iggem ni Utleg.
Inbatad na nga inpang-or na daytoy kenni Utleg ken natamaan ti siko ti maseknan ken idi ipamindua na manen a pang-uren ken naisangga ti bisikleta, ken ditoy metten a ginundawayan ni Utleg nga iniggaman ti pungto ti kayo.
Kalpasan daytoy, naginnubal na agingga nga adda dagiti naganawa kadakuada a tanod.
Naamoan nga agranrana latta dagitoy gapo ta kanayon a lumabas ni Utleg iti pagnaetngan ni Dumrique.
Mainaig iti daytoy, kunana a nangrugi ti saan da a panagkinnaawatan idi nagpatakder ni Dumrique ti punerarya iti asideg ti pagtaengan ni Utleg, ken ditoyen a maipagarop a kanayon nga harass’en ni Utleg kenkuana.
Inlawlawag na nga uray dagiti trabahador na idi iti punerarya ket maipagarop a mahar-harass pay babaen kenni Utleg
Kabayatanna, naiyuswat met ti panagsasarita dagiti dua ita nga aldaw.
