LAOAG CITY – Nagkamang ditoy Bombo Radyo Laoag ni Mr. Elioterio Aquino iti Barangay Ablan iti ili ti Burgos kalpasan ti maipagarop a panangkabkabil kenkuana dagiti agama a pakairamanan ti agtawen ti 10 idinto a ti ama ket binigbig na a ni Mr. Ronnie Vila.
Inlawlawag na nga aglaklako ti nateng ken iti dayta a gundaway ket napan iti ayan dagiti papagayam na nga agkalkalap.
Kuna na a ditoy metten nga inayaban ni Vila tapno gumatang kadagiti lakona a nateng kagiddan ti panangpainom da kenkuana ti arak.
Inyarig ni Aquino ti bagina iti tukak a no madanuman ket naringgor, no sadinno a daytoy ti patienna a rason no apay a dinangran dagiti agama.
Nupay kasta, inpetteng ni Aquino a saan latta a nainkalintegan ti inaramid dagiti agama ken kunana pay a kabayatan ti panangdangdangran da kenkuana ket saan pulos a simmubbot.
Gapu iti napasamak ket kalikagom ni Aquino nga agkiddaw ti pammakawan kenkuana dagiti agama ken mapatawan dagitoy ti multa.
Mainaig iti daytoy, inpakaammo ni Barangay Chairman Dennis Gervacio iti Barangay Ablan iti ili ti Burgos a nagturong iti balay da ni Aquino tapno ireklamo ti napasamak ngem saanna met nga ammo ti nagan dagiti nangdangran kenkuana isut gapuna a nagsubli iti kabigatan na.
Segun ken ni Gervacio, inbilin na ken ni Aquino a mapan iti sekretaryo da tapno mairekord ti napasamak ngem saanna nga inaramid.
Inlawlawag pay ni Gervacio nga awan ti agnagan ti Ronnie Vila iti barangay da no di ket Norlan Vila.
Inpalgak na nga iti pannakisarsarita na ken ni Vila ket naibaga kenkuana ti naud-udi a saan da a kinabkabil ni Aquino no di ket nasagid na laeng.
Innayon ti kapitan a nakasagana ni Vila a makisango ken ni Aquino tapno pagsasaritaan ti nasao a pasamak.
Kabayatanna, nadakamat pay ni Brgy.Chairman Gervacio a saan a taga Brgy.Ablan ni Aquino no di ket naggapo daytoy iti Barangay Buduan.
Kuna na pay a tunggal makita na ni Aquino ket nabartek daytoy ken agwalwala.
