LAOAG CITY – Inbatad ni Barangay Chairman Manny Morales iti Barangay 1 ditoy ciudad ti Laoag nga agsusukot a pannusa ti naipataw iti maysa a lakay a taga Barangay 5 a mapan koma agibelleng ti basura iti dike iti idaulwan na a barangay.
Segun kenni Morales, nasaed ni Brgy. Kagawad Allan Ancheta, ti Chairman iti Committee on Environmental Protection iti barangay da ti lakay ken sinita na daytoy no apay a mapan agibelleng ti basura iti dike iti barangay da.
Kuna na nga iti dayta metlaeng a gundaway ket inawis ni Ancheta ti nasao a lakay iti barangay hall da tapno iyendorsar na kenkuana no sadinno ditoy nga inbutaktak na a maipagarop nga adda pay dagiti barangay tanud iti metlaeng Barangay 5 a mapan agibelbelleng ti basura na iti Barangay 1 ditoy ciudad.
Inpalgak ni Morales nga iti pananginspeksyon da kadagiti basura a mapan koma ibelleng ti lakay iti dike iti barangay da ket naduktalan a saan pay a napagsisina manipod iti marunot ken saan a marunot.
Gapu iti daytoy, napatawan ti multa ti nasao a lakay gapu iti panaglabsing na iti Oplan Dalus Code no sadinno a mapan to bayadan ti maseknan iti City Treasurer’s Office.
Mainaig iti daytoy, inpakaammo ni Morales a ginandat pay ti lakay ti aglibas ngem innala da a dagus ti tulbek ti nagluganan na a tricycle kagiddan ti panangiyendorsar da met iti Philippine National Police – Traffic Division tapno maamoan no adda ti driver’s license ken dokumento ti lugan na.
Innayon na a naduktalan nga awan ti driver’s license ti lakay ken awan pay ti naipakita na a dokumento ti nagluganan na a tricycle isut gapuna a namulta daytoy ti tallo a ribo a pisos.
