LAOAG CITY – Inpakaammo ni Mr. Danver Dela Cruz, Rice Coordinator ti Regional Agricultural Fisheries Council ti Region 1 a dakkel a tulong para kadagiti mannalon ditoy probinsia ti pormalen nga iseserrek ti habagat season ditoy pagilian.
Segun kenkuana, daytoy ket kalpasan a mangnamnamada laeng iti dam para iti panagpadanumda kadagiti kataltalonanda.
Inadmitirna a saan nga umdas ti danum a mausar para iti panagpadanumda isut gapuna a kasapulanda ti tudo tapno mangsupusop iti kinakurang ti danum a pangsibog kadagiti nagduduma nga inmulada a produkto agrikultura.
Inlawlawagna a gapu ta manmano pay laeng ti mapaspasaran a panagtudo ditoy probinsia ket mapilitanda nga agmula ti sabali pay laeng a produkto agrikultura kas ti mais ken tarong nga imbes a pagay.
Kunana a gapu ta limitado ti pagpadanumda kadagiti kataltalon ket nalimitaran met ti kalawa ti pagmulmulaanda tapno saan a masayang wenno madadael dagiti inmulada.
Innayonna nga adda ti naisayangkat a panagtataripnong kadagiti padana a mannalon no sadinno a ditoy a napagsasaritaan dagiti arungaing dagitoy banag a naidanonna met iti regional office ti Department of Agriculture tapno masolbar iti kabiitan a panawen.
