LAOAG CITY – Nalamiisen a bangkay ti maysa a lakay a nabirokan iti kababantayan a paset iti Barangay Francisco iti ili ti Dingras.
Nabigbig daytoy a ni Carlito Evangelista, 84, balo, maysa a manganop ken residente iti Sitio Tagtagat, Barangay Francisco iti nasao nga ili.
Iti ekslusibo nga interview ti Bombo Radyo ken Police Sgt. Neil Jan Andres, imbestigador iti nasao a kaso, napan naganop ti biktima iti kabanbantayan ngem a saanen a napasangpet iti pagtaengan da.
Gapu iti dayta, nagturong iti kabanbantayan ni Oscar Evangelista anak ti biktima, ket dita a nakitana ti nakadasay ken awananen puot nga amana.
Nagpatulong ni Oscar kadagiti Barangay Officials, ken kadagiti kameng ti Municipal Disaster Risk Reduction Management Office pakairamanan ti Bureau of Fire Protection (BFP) ken PNP.
Mainaig iti daytoy, basar ti resulta ti post-mortem examination nga inwayat ni Dr. Rhea Andrea Domingo, Municipal Health Officer ti Dingras, ti biktima ket pimmusay gapu iti sakit na a hypertention.
