LAOAG CITY – Nasugatan ti akin-kannigid ti mata ti maysa a lakay kalpasan a nabiktima ti hit and run idiay Barangay 8 iti ili ti San Nicolas.
Nabigbig daytoy a ni Mr. Jimmy Sison, 63, residente iti Barangay 4 iti met laeng nasao nga ili.
Segun kenni Mr. Alexander Bryan Bumanglag, maysa a mekaniko, dumalyasat ti lakay a nakabisikleta ken agpadaya a direksyon idi kellaat a dinungpar dagiti nakamotorsiklo nga addaan ti plate number a NP24414.
Gapo iti daytoy, pinukkawan da dagiti nakomotosiklo ngem idi nagtuloy-tuloy da a pimmanaw ket kinamat da agingga idiay ili ti Sarrat, ken idi nakasarita da dagiti suspek a maipagarop a nakainom ti nasanger ket nakipinnatangken da a basol ti biktima ti napasamak.
Naamoan a napaay da a nangpasubli kadagiti suspek tapno mapan da kuma kitaen ti biktima isut gapo na a napan da nagrepor iti PNP.
Kabayatanna, kuna ti asawa ti biktima a naggapo iti pagtrabahoan ti biktima kas karpintero iti Barangay 10 iti nasao nga ili idi napasamak ti insidente.
Saan na met pay a maibaga no anya ti sumaruno nga addang da ngem mangnamnama a makonsensya dagiti suspek.
