LAOAG CITY – Nasugatan ti maysa a senior citizen kalpasan ti napasamak a panagtagbat iti Barangay 21, San Marcos, Sarrat, Ilocos Norte .
Nabigbig ti biktima a ni Edmond Baoat y Calagui, 61 ken residente iti nasao a barangay idinto a dagiti suspek ket isuda Dexter Lucban, Hardy Lucban, ken dua a kakadwa da a saan a pay nabigbig.
Segun kenni Police Master Sergeant Meynard Baguina, imbestigador ti PNP-Sarrat, limmabas dagiti annak ti biktima a da Wilson Ramos y Dorotan, 24 ken Billy Baoat y Doronio iti balay dagiti suspek ken ditoy a maipagarop nga inbakal da ti maysa a botelya ti arak iti grupo dagiti suspek.
Gapo iti daytoy, kinamat dagiti suspek dagiti dua agingga a napatulong dagiti maseknan iti biktima ken iti panagresponde ni Edmond Baoit ket ditoy a maipagarop a natagbat ti akin-kannigid nga ima ken rupa na.
Naamoan nga ado ti tagbat iti ima ti biktima gapo ta isu ti insarsarpa na iti buneng a nausar iti insidente.
Inbatad ni Baguina a basar iti nakalap da nga impormasyon ket amin dagiti uppat a suspek ti nangdangran iti biktima.
Kunana a ti makitkita da a motibo iti daytoy ket ti datin a susik dagiti dua a pamilya.
Dagus a naitaray iti Gov. Roque Ablan Senior Memorial Hospital and Medical Center ti biktima para iti pannakataming na ken addan iti natalged a kasasaad.
Agtultuloy met a mabirbiruk dagiti suspek a naglibas kalpasan ti insidente ken manarimaan ti nauneg nga imbestigasyon dagiti otoridad.
