LAOAG CITY – Agpanpanawagan ni Mrs. Reychelle Salba iti Barangay Sto. Niño iti ili ti Nueva Era iti siasinno man a nakakitkita iti asawa na a ni Mr. Joel Salba nga ipakaammo da koma iti ayan na.
Daytoy ket kalpasan ti maipagarop a pannaka-kidnap na babaen iti maysa a puraw nga Innova.
Iti palawag ni Mrs. Salba iti Bombo Radyo Laoag, napan nagideliver ti asawa na ti lako na nga itlog ngem ditoy metten a maipagarop a pwinersa dagiti nakalugan iti puraw nga Innova nga innala.
Inbatad na a basar kadagiti nakakita iti napasamak, maipagarop a ginuyguyud dagiti nakalugan iti Innova ti asawa na.
Immun-una iti daytoy, inbatad ti kabsat ti biktima nga iti kallabes ket adda dagiti pulis a napan nangbirbiruk ken ni Mr. Joel Salba.
Agpapan maisursurat daytoy a damag ket awan pay ti pamal-palatpatan ti pamilya Salba no sadinno ti ayan ken no siasinno dagiti nangala ken ni Mr. Joel Salba.
