LAOAG CITY – Inakusaran ni Mr. Jonnel Saclayan iti Barangay Lydia, Marcos, Ilocos Norte dagiti sumagmamano a pulis iti nasao nga ili a sinipat ken dinuklos da isuna.
Ummuna iti daytoy, kuna ni Saclayan a kabayatan ti panagbi-videoke na gapo ta agkasangay ket sinitar dagiti pulis isuda.
Inlawlawag na nga idi sinabat ni Saclayan dagiti pulis ken agipalpalawag a nakabannikes ket maipagarop a sinipat ti maysa a pulis ti ima na, dinuklos da ken kinammel ti bukot na nga inguyod rason a nakapungtot.
Inbatad na nga inbaga na pay kadagiti pulis nga ileppas da laeng ti maysa a kanta ngem ditoy a sinaludsod dagiti pulis no ammo da ti pagalagadan.
Kunana a kalpasan ti maipagarop a pannakasipat na ket pimmanaw met laeng dagiti nasao a pulis.
Innayon pay ni Saclayan nga awan ti opisyal ti barangay a napan nangsitar kadakuada.
Immapela pay ni Saclayan kadagiti pulis iti nasao nga ili a no agsitar da ket makisarita da a nasayaat.
Kabayatanna, naiget a nalikudan ni Police Senior Master Sergeant Agosto dela Cruz, chief investigator iti PNP-Marcos ti akusayon ni Saclayan a maipagarop a panangsipat ti kadwa na pulis kenkuana.
Sgeun kenni Dela Cruz, idi pasado-11 ti rabii iti Mayo 22 ket adda ti nagpatulong kadakuada a barangay tanod gapo ta saan da a mapagsardeng ti grupo ni Saclayan nga agkakanta.
Inlawlawag na nga idi napan da ket ti ina ni Saclayan ti ummuna a kinasarita na ken kuna ti ina nga agsardengen dgaiti agkakanta.
Nupay kasta, kuna nga immasideg ni Saclayan kenkuana ken nagpabigbig nga isuna ti agkasangay ken nakabannikes rason nga inbaba laeng ti pulis ti ima na saan ketdi a sinipat na daytoy.
Inbatad na nga awan pay ti napasamak a panangduklos ken panangkammel ti maysa pay a pulis iti bukot na.
Innayon na a naiget nga ipatpatungpal da ti saan a panag-videoke iti dis-oras ti rabii.
