LAOAG CITY – Nabalkot ti buteng dagiti customers iti maysa a fast food restaurant iti Brgy. 11 iti ili ti San Nicolas kalpasan nga adda ti maysa a lalaki a nangikasa ti paltog na itay laeng parbangon.
Daytoy ni inpakaammo ni Police Major Eduardo Santos, ti Chief of Police iti Philippine National Police iti ili ti San Nicolas.
Kunana a basar iti palawag ti nagreport kadakwada a taga Brgy. 4 iti nasao met laeng nga ili, ala-singko itay parbangon a napasamak iti insidente ken naisayangkat a mismo iti uneg iti nasao a pasdek negosyo.
Inpalgak ni Santos a rumrumwar iti inisyal nga imbestigasyon da a possible a nakasuron ti suspek gapu iti kinaatiddog ti pila ken matuukan a mangur-uray iti order na a makan, rason nga inruwar ti lalaki ti paltog.
Gapu iti nakaro a buteng dagiti adda iti umuna a pila ket pinauna dan ti lalaki.
Inpakaammo ti hepe nga apaman a naala ti suspek ti order na ket ditoy nga inikkat na iti magazine ti paltog ken inkasa na apaman nga rumwar iti nasao a fast food restaurant.
Inbatad na pay a kalpasan iti daytoy ket rimwar ken naglugan iti Fortuner nga agmaris ti nangisit ken nagturong iti direksiyon nga agpadaya.
Kabayatanna, inlawlawag ni Santos nga awan ti nangitutukan ti suspek ti paltog na ken awan iti nadangran.
Iti agdama, agtultuloy ti imbestigasyon ti nailian a pulisya tapno maamoan ti kinatao ti suspek no sadinno nga iberberipikar dan iti Land Transportation Office ti plate number ti nagluganan ti lalaki nga NDL 729.
Mainaig iti daytoy, ginandat ti news team ti Bombo Radyo nga alaen ti kabibiangan dagiti staff iti nasao a fast food restaurant ngem nagkedked da a nagsarita.
