LAOAG CITY – Dead on arrival iti ospital ti maysa a lalaki a biktima iti napasamak a pammaltog iti Sitio Suyo, Barangay Baruyen iti ili ti Bangui.
Daytoy ti kinumpirmaran ni Police Major Julius Basalio, ti chief of police iti ili ti Bangui.
Binigbig ni Basalio ti biktima a ni Ediemar Autriz, agtawen ti 39, naasawaan, idinto a ti suspek ket ni Sergeant Norman Campanano, agtawen ti 38, naasawaan, agpada dagitoy a residente iti nadakamat a barangay.
Ti suspek ket nakadestino iti Head Quarters 202 Brigade 2 Infantry Division Cavinte Laguna Philippine Army.
Inbaga ni Basalio a basar iti imbestigasyon da ket naamoan a ti suspek ken biktima ket ag-bayaw ken agkarruba da.
Kuna na a rumrumuar nga addan ti dati a susik iti nagbaetan dagiti dua no sadinno a maipagarop a simrek ti biktima iti balay ti suspek.
Saan met pay a maibaga ni Basalio no ania ti inaramid ti biktima gapu ta rumrumuar a nagtaray ti asawa ti suspek a napan nagpasalakan iti katugangan na a babai.
Innayon na a possible a nagbinnara dagiti dua kabayatan ti panagkita da iti dalan a nangitunda ti panangpaltog ti suspek iti biktima.
Naamoan a kabayatan ti panagawid ti biktima a nakalugan ti motorsiklo ket ditoy a napasamak ti pammaltog a nagsagabaan na ti tallo a tama ti paltog iti barukong ken maysa iti ulo na.
Narekobre iti nakapasamakan ti pammaltog ti maysa nga empty shell ti kalibre 45 a paltog ken maysa a live ammunition met laeng ti nasao a paltog.
Mainaig iti daytoy, ibilang ni Basalio a nasolbaren ti kaso gapu ta boluntaryo a simmuko ti suspek bitbit na ti inusar na a paltog, ngem saan pay a masinunuo no service firearm ti soldado ti nausar iti krimen.
Inpakaammo ni Basalio nga isagsagana dan ti maipila a kaso babaen iti inquest proceedings kontra iti nasao a suspek.
Agpapan maisursurat daytoy a damag ket saan pay a maibaga ni Basalio no ania ti nagbalin a palawag ti suspek no apay a naaramid na ti nasao a krimen gapu ta manarimaan pay laeng ti imbestigasyon da kenkuana.
