LAOAG CITY – Inadmitir ni Mr. Maximo Tauyan Jr. iti Barangay Catagtaguen iti ili ti Banna nga isuna ken ti maysa pay a kadua na ti nangtadtad iti aso ti kabarangayan na.
Segun kenni Tauyan, daytoy ket gapo ta ti nasao nga aso ket isu ti mangkagkagat kadagiti dadduma a taraken da kas iti pato, manok ken uray iti aso.
Inlawlawag na nga iti naminsan a nakita na a kagkagaten ti aso dagiti dua a pato na ket kinamat na daytoy agingga iti kabakiran ngem saan na a nagammatan agingga nga iti maysa a rabii ket napan iti sangwanan ti pagtaengan da ti nadakamat nga aso.
Gapo iti daytoy, binakal da ken natamaan ti ulo ti aso isut gapo na a nadasay, ken kalpasan daytoy ket insursur da kadagiti karruba da ti aso ngem awan ti nangadmitir no siasinno ti akin-taraken iti daytoy.
Inadmitir na a kalpasan daytoy ket tinadtad da ti aso ken inkali da agingga nga adda ti napan iti pagtaengan da a mangibagbaga nga isuda ti akin-taraken iti aso ngem ti nakasarita dagitoy ket ti kadua na a nangtadtad gapo ta adda isuna iti pagtrabahoan.
Naamoan a naisubli met ti karne ti aso ngem daytoy ket natadtaden ken nagpadespensar ti kadua na ngem desidido dagitoy a mangipila ti reklamo.
Mainaig iti daytoy, napan da met iti Philippine National Police kadua na dagiti indibidual nga addaan ti taraken a nagbalin a biktima iti pannakagat ti aso tapno ireport met ti inar-aramid daytoy, nangruna ket maipagarop nga adda ti dandani nakagat.
