LAOAG CITY – Nagballigi dagiti otoridad a nangtiliw iti maysa a lalaki iti naisayangkat nga anti-illegal drug buy-bust operation iti Brgy. 6 iti ili ti Bacarra.
Ti suspek ket agtawen ti 37, awanan ti asawa, residente ti Brgy. 7, San Pedro II iti ili ti Bacarra.
Inarestar a dagus dagiti otoridad ti suspek kalpasan a naglako ti maysa a sachet nga agdagsen ti maysa a gramo ti maipagarop a shabu nga agbalor ti P6,800.
Iti panangkapkap dagiti otoridad iti suspek ket nakumpiskar da pay iti ikot na ti 5 a sachet a naglaon metlaeng ti maipagarop a shabu.
Ti suspek ket drug surrenderee ken maibilang daytoy kas Street Level Indibidual.
Nagtalinaed ti suspek iti Philippine National Police iti ili ti Bacarra kabayatan a maisagsagana ti maipila a kaso a panaglabsing ti Republic Act 9165 wenno Comprehensive Dangerous Drugs Act of 2002 kontra kenkuana.
