LAOAG CITY – Nagballigi ti naisayangkat nga anti-illegal drug buy-bust operation iti Barangay Napu iti ili ti Badoc babaen ti nagtitipon a pwersa ti Philippine National Police-Badoc, Philippine Drug Enforcement Agency ken ti Provincial Drug Enforcement Unit iti Ilocos Norte Police Provincial Office.
Nabigbig ti suspek a ni alyas Benito, agtawen ti 26, ken residente iti Barangay Nagrebcan iti ili ti Badoc.
Kinemmeg a dagus dagiti otoridad ti suspek kalpasan a naglako ti maipagarop a shabu nga agdagsen ti 0.5 grams nga agbalor ti sangaribo a pisos iti nagpammarang a poseur-buyer.
Segun ken ni Police Capt. Edison Pasamonte, ti chief of police iti ili ti Badoc, ti suspek ket maibilang kas Street Level Individual.
Kuna na nga addan dagiti immuna a report iti opisina da a ti nasao a suspek ti agiwarwaras ti maipagarop nga illegal a droga iti nasao nga ili.
Iti agdama, nagtalinaed ti suspek iti Philippine National Police iti ili ti Badoc kabayatan a maisagsagana ti kaso a maipila kontra kenkuana mainaig iti panaglabsing ti Republic Act 9165 wenno Comprehensive Dangerous Drugs Act of 2002.
Immuna iti daytoy, naiget a naglikudan ti suspek ti alegasyon kontra kenkuana.
