LAOAG CITY – Nagballigi dagiti otoridad a nangarestar iti maysa a lalaki a maibilang kas Street Level Individual iti Brgy. 20, Paratong, iti ili ti Paoay.
Segun ken ni Police Capt. Jackson Sugayen, ti chief of police iti ili ti Paoay, ti suspek ket agtawen ti 43, naasawaan ken residente iti Barangay Tabug iti ciudad ti Batac.
Inlawlawag ni Sugayen a nakaawat da ti report babaen ti 911 nga adda ti maipagarop a transaksyon ti illegal a droga iti kamposanto iti Barangay Paratong iti ili ti Paoay isut gapuna a dagus da a nagturong iti lugar.
Kuna na nga apaman a nakadanun da iti lugar ket nakita da ti suspek nga adda ti karirriri na a maysa a lalaki a nakatugaw iti motorsiklo.
Inbatad ni Sugayen nga idi bumaba da iti patrol car ket insigida a pinataray ti saan pay a nabigbig nga indibidual ti motorsiklo na idinto a ti suspek ket nakita da nga adda ti inpurwak na.
Innayon na nga iti panangbiruk da ti inpurwak ti suspek ket ditoy a nakita da ti tallo a sachet a naglaon ti maatap a shabu nga agdagsen ti sumuruk-kumurang nga 4 a gramo ken mapatta-patta nga agbalor ti P27,200.00
Nakumpiskar pay manipod iti suspek ti maysa a lighter, mays a pedaso ti 500 peso bill, maysa a pakete ti sigarilyo ken maysa a cellphone.
Iti agdama, nagtalinaed ti suspek iti Philippine National Police iti ili ti Paoay ken maisagsaganan ti kaso a maipila kontra kenkuana mainaig iti panaglabsing ti Republic Act 9165 wenno Comprehensive Dangerous Drugs Act of 2002.
