LAOAG CITY – Nasugatan ti maysa a lalaki kalpasan a napaltogan kabayatan ti panangiwayat ti PNP-Pasuquin ti anti illegal gambling operation iti Barangay Davila iti nasao nga ili.
Nabigbig ti biktima a ni Mr. Reynald Rapol, agtawen ti 19, ken residente iti nasao a barangay.
Basar ti inisyal nga impormasyon, bayat nga agsusugal dagiti bumarangay ket napasungadan da dagiti kameng ti PNP rason a nagtataray dagitoy.
Nupay kasta, naamoan a nagpaputok dagiti pulis ken maipagarop a napaltogan ti biktima ken dagus a naitaray iti ospital ditoy ciudad ti Laoag babaen kadagiti otoridad.
Kabayatanna, kuna ti ina ti biktima a ni Mrs. Flordeliza Rapol, bayat nga agur-uray ti anak na ti sumanglad a bangka manipud iti baybay ket napan nagbuya kadagiti agay-ayam ti baraha ngem nagtataray da idi adda dagiti pulis.
Inpetteng na a nangeg da ti putok ti paltog ken idi nakita na ti anak na ket adda ti tama ti luppo ken takyag na.
Malaskid iti daytoy, kuna ti ina a maipagarop a kinamat pay ti pulis ti maysa pay nga anak na a menor de edad ken nagpappaputok.
Kunana a dagus na a kinomprontar dagiti pulis ken inbilin na iti kasinsin na nga i-video da dagitoy ngem maipagarop nga inagaw dagiti otoridad ken indelete da dagiti video.
Naamoan nga inpetteng met dagiti pulis a naidaramudom laeng ti biktima isut gapo na a nasugatan.
Gapo iti pungtot na ket inbaga na kadagiti kameng ti PNP a saan a gapo a pulis da ket addan ti karbengan da a mangpaltog iti siasinno man a tao.
Mainaig iti daytoy, desidido ti pamilya ti biktima a mangipila ti kaso kontra kadagiti saan pay a nabigbig a pulis a maipagarop a nakasibilyan bayat ti operasyon.
Inlawlawag met ni Renato Rapol Sr., lolo ti biktima a saan a baraha ti ay-ayam dagiti tattao iti lugar no diket “dama”.
Kunana a nakaunget pay dagiti otoridad kenkuana gapo ta saan na nga inanawa wenno pinagsardeng ti panagay-ayam dagiti maseknan.
Inakusaran na pay dagiti otoridad a nakainom ti nasanger.
