LAOAG CITY –Napaturongan ti paltog ti maysa a lalaki iti maysa a bar ditoy siudad ti Laoag.
Ti biktima ket maysa nga agtawen 26 a lalaki awanan asawa, ken residente ditoy siudad.
Idinto a dagiti suspek ket maysa nga agtawen 36 a lalaki, naasawaan, Heavy Equipment Operator, ken residente iti Quezon City iti National Capital Region, ti maysa ket agtawen 27a lalaki, naasawaan, mapapati a CAFGU, ken residente iti North Cotabato, ken ti maysa met ket agtawen 36 a lalaki, naasawaan, kontraktor, ken residente iti Jaen, Nueva Ecija.
Basar ti Ilocos Norte Police Provincial Office (INPPO), ti insidente ket nangrugi iti maipagarup a panang-harass dagiti suspek iti maysa nga empleado ti nasao a bar a nagresulta iti riribuk.
Bimmallaet ti biktima tapno malappedan ti nasao a panang-harass ngem nagresulta daytoy iti nabara a panagririri.
Kabayatan ti panagririri, nangiruar ti maysa a suspek ti paltog iti saan pay a masinunuo a kalibre ti paltog nga inturongna iti barukong ti biktima.
Kalpasan ti insidente, nagtalaw dagitoy a luganda ti maysa nga agmaris ti blue a Ford Raptor.
Idinto ta nai-report ti insidente, insigida a nangiwayat ti Laoag City Police Station ti hot pursuit operation ken balligi a natukon da ti lugan iti ili ti Paoay.
Dagos met a nakikoordinarda iti Paoay Municipal Police Station no sadinno a nagturong da amin iti Laoag City Police Station a kadwa da dagiti suspek.
Positibo met a nabigbig dagitoy ti biktima ket insigida a natiliw ken nangitunda iti pannakarekobre ken pannakakumpiskar ti maysa a Glock 17 Gen 5, kalibre 9mm, nga addaan iti magasin a naglaon ti 11 live rounds, maysa nga M1911, kalibre .45, a naglaon met ti 6 a live rounds, 29 live rounds ti kalibre 9mm, ken nadumaduma nga identification cards.
Iti agdama, adda dagiti suspek iti kustodiar ti pulis para iti pannakaisagsagana ti maipila a kaso kontra kenkuada.
