LAOAG CITY – Kinumpirmaran ni Police Captain Eddie Suyat, chief of police ti PNP-Paoay ti napasamak a pammaltog iti Barangay San Pedro iti nasao nga ili a nakasugatan ti maysa a lalaki.
Segun kenni Suyat, naggapo ti biktima iti farm na ken agawid kuman iti Barangay Paratong bayat a nakabisikleta ken sinurot dagiti dua a suspek a nakalugan ti motorsiklo.
Inlawlawag na nga iti adda ti biktima iti asideg iti sango ti simbaan ket pinaltogan dagiti suspek a nakalugan ti motorsiklo rason a natamaan ti tengnged ti lalaki.
Kunana nga idi natuliden ti biktima ket nagsubli dagiti suspek ken innala da ti wallet a nakaipanan ti sangaribo a pisos, IDs ken dokumento ken kalpasan daytoy ket dagus da a naglibas a nagturong iti amyanan a direksyon.
Inbatad pay ni Suyat a ti maysa kadagiti kitkitaen da a motibo iti pammaltog ket ti robbery gapo ta rumrumwar a naglako ti biktima ti baka.
Inbaga na a posible nga am-ammo dagiti suspek ti biktima ken inpagarop da a naglako ti baka ti lakay.
Innayon pay ti hepe a basar iti palawag ti biktima ket saan na a nabigbig dagiti suspek
Agpapan ita ket saan da pay nga ammo no anya a paltog ti nausar gapo ta awan ti narekobre iti nakapasamakan ti pammaltog.
Iti panagimbestigar da ket naamoan da a ti biktima ket awan ti nakariri na iti barangay da.
Iti agdama ket agtultuloy ti imbestigasyon dagiti otoridad ken panangbirok da kadagiti dua a suspek.
