LAOAG CITY – Dead-on-arrival iti ospital ti maysa a lalaki idinto a nagtalinaed nga awan ti puot na ti kasinsin na a iti napasamak a desgrasya iti paset ti Manila North Road iti ili ti San Nicolas.
Nabigbig ti natay a ni Robert dela Cruz Jr., agtawen ti 23, residente iti Brgy. Baay iti ciudad ti Batac, idinto a ti kasinsin na a nagtalinaed a kritikal ket ni Ranyell Dela Cruz.
Segun iti imbestigasyon ti PNP-San Nicolas, bayat nga agpapaabagatan a direksyon ti motorsiklo ket dita a kellaat a naidungpar da iti poste.
Dagus a naitaray iti Mariano Marcos Memorial Hospital and Medical center idiay ciudad ti Batac ni Robert Dela Cruz Jr. ngem naideklara a natayen, idinto a ti kasinsin na ket naitaray iti Governor Roque Ablan Senior Memorial Hospital ditoy ciudad ti Laoag para iti pannakatamingna.
Nupay kasta, bayat ti panangitaray ti ambulansya ti biktima iti GRASMA nga inturong ni Police Corp. Sonny Quaresma ket dita a kellaat a nadungparna ti maysa a motorsiklo a rumrumuar manipod iti maysa a pangananan iti Bacarra road ditoy ciudad nga inturong ni Jaypee Ancheta ti motorsiklo lubbon na ti live-in partnerna ken ti agtawen ti 1 nga anakda.
Naamoan nga agpapada a nagpasar ti sugat dagiti nakalugan ti motorsiklo.
Agtultuloy ti imbestigasyon dagiti otoridad mainaig iti napasamak nga insidente.
