LAOAG CITY – Natay ti maysa a lalaki kalpasan a nalmes iti Madongan Dam iti paset ti Barangay Cacafean iti ili ti Marcos.
Daytoy ti inpakaammo ni Police Lt. Rudy James Jacalne, ti chief of police iti ili ti Marcos.
Inlawlawag ni Jacalne a basar iti imbestigasyon da ket napasamak ti insidente iti oras ti alas-dose itay aldaw.
Inbaga ni Jacalne a ti biktima ken grupo na ket agripriper da iti Vintar ken Piddig, ngem adda nangitawag iti boss da nga adda ti agpariper iti ili ti Marcos.
Nupay kasta, idi agawid ti biktima ken dagiti kakadwa na ket dimmagas da a nangan iti dam.
Inpakaammo ni Jacalne a napudutan ti biktima isut gapuna a napan nagdigus ngem saanna nga inpagarop a ti timmapogan na a danom ket naadalem no sadinno a saanna pay unay nga ammo ti aglangoy.
Inpasingked ni Jacalne a dagus da a nagresponde apaman a naitawag kadakuada ti napasamak ngem iti pannakaeksamen ti biktima ket nakumpirmaran nga awanen ti biagna.
