LAOAG CITY – Maysa a resolusyon ti naipila iti Senado a manggutgutigot ken ni Senador Ronald “Bato” dela Rosa a boluntaryo a sumuko kadagiti otoridad ken dumalan iti umiso a proseso ti linteg mainaig ti warrant of arrest nga inparuk-at ti International Criminal Court (ICC) kontra kenkuana.
Ti Senate Resolution No. 395 ket inpila da Senador Francis “Kiko” Pangilinan, Vicente “Tito” Sotto III, Panfilo Lacson, Risa Hontiveros, ken Bam Aquino kabayatan a nagtalinaed iti Senado ni dela Rosa iti babaen ti protective custody.
Maipalagip nga idi Lunes, naikabil ni dela Rosa iti protective custody ti Senado iti babaen ti baro a liderato ni Senate President Alan Peter Cayetano.
Iti resolusyon, inbatad dagiti senador a nupay adda dagiti bileg ken pribilehiyo ti kangatoan a pagpandayan linteg iti Kongreso iti babaen ti Konstitusyon, saanna a palubusan ti Senado nga agserbi kas sanctuary wenno mangipaay ti immunity manipud iti pannakaarestar ti siasinno man a miyembro na.
