LAOAG CITY – Pimmusay ti maysa a lalaki kalpasan ti panagdinnungpar ti ten wheeler dump truck ken motorsiklo idiay Barangay 31, Dagupan, Vintar, Ilocos Norte.
Nabigbig daytoy a ni Arnel Balmilero y Agpuldi, agtawen ti 31, addaan ti live in partner, maysa a mannalon ken residente iti Barangay 32, Cabangaran iti ili Vintar idinto a ti nakadungpar ket ni suspek Elymar Fiesta y Aceret, agtawen ti 36, naasawan, company driver ti District 1 C&J BUILDERS ken residente iti Brgy 20 San Pablo, iti ili ti San Nicolas.
Segun kenni Police Major Joseph Baltazar, ti chief of police ti PNP-Vintar, agpaabagatan nga umuli iti kurbaan a paset ti kalsada idinto a ti motorsiklo ken agsalog nga agpaamyanan a direksyon idi nagdinnungpar dagitoy.
Gapo iti daytoy, kuna ni Baltazar a nagsagaba ti sugat ti ulo ti biktima ken iti nagduduma a paset ti bagi na ken dagus a naitaray iti Tamdagan Distict Hospital ngem naideklara a dead on arrival.
Iti agdama ket adda iti kustudiyar ti PNP-Vintar ti driver ten wheeler dump truck ken manamnama a sumango iti kaso a reckless imprudence resulting in homicide.
