LAOAG CITY – Natay ti maysa a lalaki kalpasan ti napasamak a desgrasya iti intersection iti Gol-Dol Bridge iti Barangay 22, San Cristobal iti ili ti Sarrat.
Nabigbig ti natay a ni Feliciano Ganotisi y Laguardia, agtawen ti 55 ken residente iti Barangay 19, Sto. Tomas iti nasao met laeng nga ili ken naglugan ti Black Honda Wave.
Karaman pay kadagiti nadesgrasya ket Lexter Lagundi y Diaz, agtawen ti 28, awanan ti asawa ken residente iti Barangay Nalasin iti ili ti Solsona ken inturong na ti Mio Soul 125 ken ti driver ti Hyundai Ion a ni Jose Ruvita y Tagalicud, agtawen ti 49, naasawaan ken residente iti Barangay San Vicente, Sarrat.
Iti imbestigasyon dagiti kameng ti PNP-Sarrat, agpalaud a direksyon ni Ganotisi idinto nga agleft turn met ni Lagundi nga agturong iti daya a direksyon idi nagdinnungpar dagitoy.
Gapo iti kinapigsa ti impact ti desgrasya, nagtultulidtid ti Mio a rason a nairaman pay ti maysa a behikulo nga inturong ni Ruvita idinto a ni Ganotisi ket naitupa ti ulo na.
Naitaray ni Ganotisi iti Gov. Roque Ablan Senior Memorial Hospital ngem naideklara a dead on arrival idinto a ni Lagundi ket naiyakar iti Mariano Marcos Memorial Hospital and Medical Center.
Iti agdama ket awan pay ti pinal a saritaan dagiti karaman ken iti pamilya ti pimmusay iti napasamak a desgrasya.
