LAOAG CITY – Natiliw ti maysa a lalaki kalpasan a nagpammarang kas maysa Police Lieutenant babaen iti naisayangkat nga Entrapment Operation a nagbinnuligan ti Ilocos Norte Police Provincial Office ken ti Philippine National Police ditoy ciudad ti Laoag iti paset ti St. William Cathedral a sakupen ti Brgy. 15.
Nabigbig daytoy a ni Ronnie Andrei Hermosa Carlos, agtawen ti 25 ken residente ti Brgy. 11 iti ili ti Bacarra.
Segun ken ni Mark Alwyn Sagun Nagtalon, agtawen ti 27, residente ti Brgy. Isic-isic iti ili ti Vintar a nagbalin a biktima ti nasao suspek, nagikkat daytoy kas maysa a security guard iti maysa a dakkel a grocery store ditoy ciudad ti Laoag tapno agtrabaho kadua na ti suspek.
Inbatad na a ti ub-ubraen da ket ti agipagna kadagiti nagduduma a dokumento iti Gobierno Probinsial ti Ilocos Norte, INPPO ken ti PNP Laoag.
Inlawlawag na a nagtalek daytoy gapu ta tunggal agkita da iti suspek ket nakasuot daytoy ti uniporme ti pulis rason a saan a dagus daytoy a nagdudua agingga a naripar na nga awan ti makitkita na a resibo kadagiti dokumento nga ipagpagna da.
Kunana a nagam-ammo da laeng iti suspek gapu ta agkaseraan ti dati a katrabahoanna iti dakkel a grocery store ken ti suspek.
Mainaig iti daytoy, nakumpiskar iti suspek ti maysa a bagpack a naglaon ti badbado pakairamanan ti maysa a face mask nga addaan ti marka a PULIS ken short nga addaan met ti tatak a PULIS.
Awan met ti maipakita ti suspek nga aniaman a banag a mangipaneknek a daytoy ket maysa a pudno a pulis.
Kabayatanna, inpetteng ti suspek a saan na ammo dagiti maiyak-akusar kontra kenkuana.
