LAOAG CITY – Kinumpirmaran ni Police Major Joseph Baltazar, ti chief of police ti PNP-San Nicolas ti pannakatiliw ti maysa a lalaki gapo iti panagtakaw na iti pagtaengan iti paset ti Barangay 11 iti nasao nga ili.
Binigbig ni Baltazar ti suspek a ni Carl Joseph Barroga alyas Alien, agtawen ti 25 idinto a ti biktima a ni Jessie Manjares y Bansela, agtawen ti 18 ken agpada a residente iti nasao a barangay.
Segun kenni Baltazar, idi rabii ti Hunyo 23 ket napan nagreport ti biktima iti PNP kalpasan a sinerrek ti suspek ti pagtaengan da ken innala na ti 1,700 a pisos.
Inlawlawag ni Baltazar a basar iti panagimbestigar da ket rumrumwar a sipud pay ubing ti suspek ket ar-aramiden nan ti agtakaw.
Kunana a sakbay a napasamak ti panagtatakaw iti Barangay 11 ket nakarwar iti BJMP ditoy ciudad ti Laoag ti suspek kalpasan a nabalod gapo met laeng iti kaso a panagtatakaw, ken namin-adon a daras a naibalod.
Malaksid iti daytoy, inbatad ni Baltazar a tinakawan pay ti suspek dagiti trabahador iti Barangay Hall da.
Mainaig iti daytoy, naamoan a nailasin ti biktima ti suspek isut gapo na a balligi a natiliw dagiti kameng ti PNP.
Kabayatanna, kuna ni Baltazar a desidido ti biktima a mangipila ti kaso kontra iti suspek.
