LAOAG CITY – Balligi ti naiyuswat a drug police response iti Barangay San Juan iti ili ti Paoay.
Nabigbig ti suspek a ni Mr. Edwin Pambid residente iti Barangay Quiling Norte iti ciudad ti Batac.
Nakumpiskar kenkuna ti uppat a sachet ti maipagarop a shabu ken rumrumuar a mapan na ideliver dagitoy iti nasao a ciudad.
Mainaig iti daytoy, nagkedked met nga agkomento ni Pambid seknan iti pannakatiliw na.
Kabayatanna, kuna ni Police Lt. Jackson Sugayen, ti mangidadaulo Provincial Drug Enforcement Unit (PDEU) a sakbay ti pannakatiliw ni Pambid ket adda ti nangited ti impormasyon kadakuada seknan iti panagideliver ti droga.
Kalpasan daytoy, kunana a nagtignay da a dagus ken apaman a nakadeploy ti operatiba ket pudno ti impormasyon nga adda ti dua a tao nga agkita iti nasao a paset ti lugar.
Inlawlawag na nga alisto dagiti napasamak no sadinno ket nakataray ti maysa idinto nga idi inatsigan da ni maysa pay nga indidbiual ket adda ti inbakal na a pouch ken adda ti naipurwak a sachet ti maipagarop nga iligal a droga.
Inbatad na a a daytoy ti ummuna a gundaway a nadeterminar ni Pambid ngem adda dagiti impormasyon nga adda ti pakainaigan na iti iligal a droga.
Naamoan pay manipud kenni Sugayen a saan a pulos agsao ni Pambid no siasinno wenno anya ti pakabigbigan ti kadua ni Pambid.
Kabayatanna, inbatad ni Barangay Chairman Joenel Cuanang iti Barangay Quiling Norte iti ciudad ti Batac a ni Edwin Pambid ket maysa a driver nga agbibyahe idiay Bulacan.
Segun kenni Cuanang, nasdaaw gapo ta saan na a napalabas iti naestablisar a barangay checkpoint da.
Inlawlawag na a sipud nangrugi ti pandemya ket on-call ti panagbyahe ni Pambid wenno adda ti kasinnublat na a kakadua na a byahero.
Mainaig iti daytoy, awan met ti madi a rekord ni Pambiad iti uneg ti barangay da ngem saan met a simmuko ken awan ti ammo na a pakainaigan na iti iligal a droga.
Inpetteng na nga iti paset ti kataltalonan iti barangay da ket awan ti barikada na isut gapo na nga adda ti posibilidad a naglibas ni Pambid nangruna ket saan da a napalabas iti checkpoint da.
