LAOAG CITY – Nadisgrasya ti maysa a lalaki nga agturong koma ti pagtrabahoan kalpasan a dinungpar ti maysa a Fortuner iti airport road iti paset ti Barangay 48 – A Cabungaan ditoy siudad ti Laoag.
Ti biktima ket adda ti umno nga edad, gasoline boy, awanan asawa, ken residente iti Sitio 3 Baragay 48 – A Cabungaan.
Segun iti pannakisarsarita ti Bombo Radio Laoag ken ni Mr. Sammy Dy, ti Chief Tanod ti nasao a barangay ken uliteg pay ti biktima, nga apaman a rumuar ti kaanakanna iti sitio-da nga agturong ti laud idinto a napaspas ti panagdalyasat ti Fortuner nga agpadaya.
Gapu iti kinapaspas ti Fortuner, kellaat a nadungparna ti biktima a nangitunda ti nakaro a panagsagabana a pakairamanan ti pannakatukkol ti akinkannigid nga abagana, palaypalayna, ken nasugatan ti nagduduma pay a paset ti bagina.
Saan met a nasugatan ti driver ti Fortuner kasta payen dagiti dua a nakalugan ngem nakaro ti pannakakuppit ti sango a paset ti lugan idinto a ti motor ket nadadael ti amin a partesna ken naikkat pay ti akin likod a ligayna.
Iti agdama, naitaray ti biktima ti balay pagagasan para iti naan-anay a pannakatamingna ken idinto a ti Fortuner ket addan iti kustodiar dagiti polis.
Naamoan a nasanger ti driver ti Fortuner, a rason ti napasamak nga insidente.
