LAOAG CITY – Natay ti maysa a lalaki iti napasamak a pammaltog iti Barangay 44, Zamboanga ditoy ciudad ti Laoag.
Nabigbig ti biktima a ni Chris John Ancheta, addaan ti live-in partner idinto a ti suspek ket mismo a ti ama na a ni Richard Ancheta, agpada a residente iti nasao a barangay.
Iti pannakiinnuman ti Bombo Radyo Laoag iti karruba ti suspek ken biktima a ni Mrs. Mafemae Dumrique, inbaga na a kabayatan ti panagmermeryenda da ket nakangngeg ti kanalbuong isut gapuna a linukatan na ti ridaw da.
Inbaga na a ditoy a nakita na nga agtartaray dagiti annak ti biktima ken inpakaammo da kenkuana nga agpappaputok ti paltog ti ama da rason a pinastrek na dagitoy iti uneg ti balayda.
Innayon na a nakita na met ti live-in partner ti biktima nga agtugtugaw ken agsangsangit ngem saanen nga immasideg pay.
Mainaig iti daytoy, inbatad ni Doctor Joseph Adaya, ti City Health Officer ditoy ciudad ti Laoag a basar iti inisyal a panangeksamen na iti bangkay ti biktima ket umabot iti lima wenno ad-ado pay ti tama na iti bala ti paltog ngem possible a ti tama iti barukong na ti nakatayan na.
Kabayatanna, inbatad ni Police Lt. Col. Mar Louie Bondoc, ti chief of police ditoy ciudad ti Laoag nga agtultuloy pay laeng ti imbestigasyon da tapno maamoan no ania ti nagririan dagiti agama a nangitunda ti pananpalto-paltog ti suspek iti anakna.
Inpakaammo ni Bondoc a basar iti inisyal nga imbestigasyon da ket kabayatan ti kaadda ti biktima ken ti live-in partner na iti balayda ket simmangpet ti suspek ket ditoy a nagriri da agingga a napan nangala ti paltog ti ama nga Ancheta.
Rumrumuar a nakiinnagaw ti biktima ti paltog iti ama na ngem isu metten ti panangpalto-paltog kenkuana ti suspek a nangitunda ti pannakatay na.
Nagtalapwagaw a dagus ti suspek bitbit na ti saan pay a masinunuo ti kalibre na a paltog nga isu ti birbiruken dagiti otoridad iti agdama.
