LAOAG CITY – Naipaayan ti resolution of commendation ni Mrs. Maria Nolasco Pascual ti Brgy. 28, Bonifacio Street ditoy siudad ti Laoag.
Daytoy ket maibasar iti Draft City Resolution No. SP-2025-005 gapu iti pannakadanonna iti sangagasut a tawen ken kas panangbigbig iti panagserbina iti komunidad.
Segun ken ni Sangguniang Panlungsod Member Juan Conrado Respicio II a ti centenarian ket maysa a pannakabigbig kadagiti makadanon iti kastoy a tawen rason a nasken laeng a maipaayanda ti gungguna.
Inbatadna a ni Pascual ket naispasngay idi Disiembre 22, 1924 ken sinelebraranna ti centerarian a tawenna itay laeng napalabas a tawen.
Inlawlawagna a pinadakkelna dagiti uppat nga annakna kas maysa a tagalaba ken katulong kadagiti paggilingan ti bagas nga isu ti nangsupusop iti panangpabasana kadagiti amin nga annakna nga itan ket agpapada a professional.
Mainaig iti daytoy, nagserbi pay ni Mrs. Pascual iti Rural Improvement Club wenno Samahan ng mga Kababaihan sa Baranggay ken Barangay Senior Citizen Association.
Kabayatanna, daytoy a resolusion ket naipasa iti maikadua ken maudi a pannakaibasana kabayatan iti regular session iti Sangguniang Panlungsod.
