LAOAG CITY – Napalaos ti panagyaman ni Mr. Jerwin Valencia, Teacher III iti Dingras National High School iti manamnama a maawat na a pammadayaw iti prestihiyoso a 2023 Princess Maha Chakri Awards (PMCA).
Segun kenni Valencia, Rank 1 isuna ditoy Rehiyon Uno kenkinalaban na kadagiti dadduma pay a nagaplikar.
Ti nasao a pammadayaw ket kas pammigbig iti komtirbusyon na iti edukasyon babaen iti proyekto na a para kadagiti agkasapulan.
Inlawlawag na a karaman kadagiti ipapaay da a tulong ket dagiti makan, health kits, school supplies pakairamanan pay ti panang-tutor kadagiti ubbing.
Nagyaman met daytoy kadagiti amin a timmulong kenkuana gapo ta saan na met a maaramid daytoy no awan ti tulong dagiti tattao.
Mainaig iti daytoy, kunana a ti nanggutigot kenkuana no apay nga inrubwat na ti kastoy a programa ket ti isem dagiti ubbing a makaaw-awat ti tulong.
Ni Valencia ti maysa kadagiti 11 nga indibidual nga umawat iti Princess Maha Chakri Awards iti Southeast Asia ken manamnama nga awaten na daytoy ontono Oktubre 17 idiay Thailand.
Ti “AGBALAYGI” Project na a gagem na a makaipatakder iti kongkreto a balay iti probinsya babaen iti bayanihan no sadinno karaman kadagiti benepisyaryo ket dagiti estudyante, kasta met dagiti nagbalin a biktima ti uram.
Malaksid iti daytoy, inrubwat pay ti Valencia ti Backyard to Kitchen Project Year 2 iti panangidaulo ti International Professionals Association of Dingras, ken nagbalin a paset iti Urban Gardening Project and Boy Scouts of the Philippines kasta pay ti proyekto a SAGUT-AYAT Para Iti Arapaap.
