LAOAG CITY – Umanamong ni Mr. Roy Pandaraoan, Instructor ken Guidance Counselor iti Sarrat National High School ti lungalong ni Senador Ramon ‘Bong’ Revilla Jr. ti no-homework policy iti elementarya ken junior high school.
Segun kenni Padaraoan, patien na anapateg unay ti oras para iti pamilya nangruna no iti weekends rason nga isuna ket saan unay nga agit-ited ti assignment.
Inlawlawag na a no man agited da ti assignment dagit ubbing ket para laengen iti enhancement ti ubing iti naglabas a lesson da.
Kunana pay a posible a saan a maasisitiran dagiti nagannak dagiti annak da iti panagaramid da ti assignment nangruna no aggapo dagitoy iti pagtrabahoan.
Ummuna iti daytoy, iti babaen ti Senate Bill No 1792 wenno ti “No Homework Act of 2023,” ilunglungalong daytoy nga awan ti mandatory nga assignment iti weekend no di ket maaramid laeng iti weekdays.
Naipalaon pay iti gakat a masapol a minimal laeng ken saan a sumurok-kumurang a dua nga oras ti panagaramid ti assignment dagiti estudyante.
Inpetteng ti senador a dagiti take-home assignment ket mangipababa iti produktibidad ken karirikna dagiti estudyante iti edukasyon, nga agtungpal iti ad-ado a dropout rate ken nababbaba a grado.
Inbatad pay ni Revilla a no basbassit ti maited nga assignment kadagiti estudyante ket ad-ado ti maipaay nga oras dagiti nagannak kadagiti annak da.
Inpalagip ni Revilla nga iti panagadal idi 2009 nga inyuswat ti The Organization for Economic Cooperation and Development’s Program for International Student Assessment (OECD PISA) ket naduktalan a ti nayun nga oras para iti assignment ket adda ti bassit nga epekto na iti performance ti maysa nga estudyante.
