LAOAG CITY – Mapukpukaw ti maysa a mangngalap a ni Mr. Eduardo Lequin, agtawen ti 62 ken residente iti Barangay Davila iti ili ti Pasuquin.
Basar iti anak ti mangngalap a ni Ms Janice Alvasan, alas-tres ti parbangon idi Agosto 22 ita a tawen idi napan timmapog iti baybay ti amana tapno agkalap.
Kuna na nga iti oras ti alas-onse ti bigat ket adda dagiti nakakita iti ama na a pada na met laeng a mangngalap ken inawis da daytoy nga agawid dan, ngem nagkedked gapu ta possible a kurang wenno awan pay ti nakalap na.
Nupay kasta, inbatad na nga idi madanun ti oras ti alas-singko ti malem a saan da pay a napasangpet ti amana ket nagbalaw dan isut gapuna a napan biniruk dagiti kakabsat na ngem saan da a nakita.
Inpakaammo ni Alvasan a timmulong payen dagiti sumagmamano a mangngalap a nagbiruk iti amana ngem agpapan maisursurat daytoy a damag ket saanda pay a nabirukan ni Lequin.
Nakikoordinar metten ti Philippine National Police iti Philippine Coastguard para iti al-alisto a pannakabiruk iti nasao a mangngalap, ngem ti kalikagom ti pamilya ni Lequin ket helicopter koma ti mausaren.
Mainaig iti daytoy, inbatad ni Alvasan nga iti panagturong dagiti kameng ti Municipal Disaster Risk Reduction and Management Council iti ili ti Pasuquin ket naibaga da kadakuada a saanda a sigurado iti kalikagom da nga helicopter ti mausar gapu ta dakkel ti magastos.
Gapu iti daytoy, nagpanawagan ni Alvasan ken ni Congressman Sandro Marcos a tulungan na koma dagitoy, partikular iti pannakausar ti helicopter a pagbiruk iti ama da.
Kabayatanna, inpakaammo ni Alvasan a ti bangka ti ama na ket agaris ti berde ken ti suot na idi napan nagkalap ket nangisit a jacket, ti pajama na ket agmaris ti maroon, ken ti nakabarabad iti ulo na ket puraw a bado.
