LAOAG CITY – Kinumpirmaran ni Police Lt. Belen Baoit, ti deputy chief of police idiay ili ti Dingras nga agtultuloy a maob-obserbaran iti Mariano Marcos Memorial Hospital and Medical Center idiay ciudad ti Laoag ti biktima ti napasamak a desgrasya idiay Sitio San Gabriel, Brgy. San Marcelino ti nasao nga ili.
Nabigbig ti biktima a ni Joseph Agpalsa y Ganitano, agtawen ti 42, naasawaan, mannalon ken residente iti Brgy. 20, San Jose iti ili ti Sarrat.
Segun ken ni Baoit, nagturong ni Agpalsa idiay Barangay San Marcelino iti ili ti Dingras tapno mapanna bisitaen dagiti kabagyan na.
Nupay kasta, bayat ti panagdaldalyasat ti biktima a nakalugan ti kurung-kurong ket napukawan ti kontrol ket naidungpar iti barikada iti irigasyon a nangitunda ti pannakatennag na ken nagsagaba ti kamuol ken sugat ti nagduduma a paset ti bagina.
Innayon na a rumrumuar a nakainom ti nasanger ti nasao a biktima idi napasamak ti insidente.
