LAOAG CITY – Balligi a naarestar ti maysa a mannalon nga babaen iti naisayangkat nga Anti-Illegal Drug Buy-Bust Operation iti Brgy. Acnam iti ili ti Nueva Era.
Nabigbig ti subject a ni John Wayne Domingo, agtawen ti 55, naasawan, mannalon ken agtrabtrabaho iti maysa a simbaan, ken residente iti nadakamat a lugar.
Nakumpiskar manipud iti suspek ti 4 a plastic sachet ti mapapati a shabu nga agdagsen ti .089 grams ken addaan ti street value a P6, 052.00, P1,000 a nausar kas buy-bust money, maysa a brown wallet, maysa a motorsiklo ken kitchen knife.
Nupay kasta, naiget nga inlibak ti subject a saanna a kukua dagiti nakumpiskar a mapapati a shabu kenkuana ken naipabulsa laeng daytoy.
Iti met biang ti asawa na a ni Mary Jane Balagat nga awan ti pitaka a brown ti asawana idinto a no mapan daytoy iti taltalon ket saan nga agitugot iti wallet.
Mainaig iti daytoy ket inbatad ni P/Cpt William Sotelo chief of police iti Philippine National Police iti ili ti Nueva Era, dua a bulan dan a mon-monitoren ti subject no sadinno maipagarup nga agus-usar ken aglaklako daytoy ti illegal a droga.
Innayonna nga adda ti pakainaigan ti subject kadagiti indibudual nga imununnan a natiliw no sadinno kinunada a daytoy ti maysa kadagiti agilaklako iti dadduma pay a residente.
Naammoan nga idi tawen 2020, adda ti sangsanguen ni Domingo a kaso nga attempted homicide ngem na-dissmissed daytoy gapu iti probable cause.
Inpakaammonna nga adda ti record ti subject a maltreatment wenno saan a napintas a panagtrato na kadagiti nagannak iti daytoy laeng a tawen na no sadinno ti nagbalin laeng a pannusa ket 3 nga aldaw a community service.
Kabayatanna, agtaltalinaed ti subject iti kuerpo ti Philippine National Police iti ili ti Nueva Era.
Iti agdama ket maisagsaganan dagiti dokumento para iti pannakaipila ti kaso iti suspek babaen ti Republic Act No. 9165 wenno Comprehensive Dangerous Drugs Act of 2002.
