LAOAG CITY – Pimmusay a dagus ti maysa a mannalon kalpasan a binarreta ti pada na a mannalon ti rupa na iti kataltalunan idiay Sitio Uma, Brgy. Talingaan ditoy ciudad ti Laoag.
Nabigbig ti biktima a ni Mr. Orlando Felix idinto a ti suspek ket ni Romulo Pascual, agpada a residente iti nasao a barangay.
Napasamak ti krimen kabayatan ti papan panagpakan ti biktima iti taraken na a baka iti taltalon.
Segun ken ni Doctor Rodrigo Catcatan a nangeksamen ti bangkay ti biktima, nadurdur ti rupa ni Felix gapu ti nakaro a pannakabarreta na a nakairamanan ti utek na a nangitunda ti ipapatay na.
Kinumpirmaran met ti syuman ti biktima a ni Abellano Martinez, addan ti panagriri da Felix ken Pascual itay kallabes ngem naurnus met laeng kalpasan a nausay da iti barangay ken nagsarita da pay iti PNP.
Inbatad ni Martinez nga awanen ti ammo na a panagriri dagiti dua kalpasan a naurnus ti immuna a panagriri da.
Rumrumuar a ti nagririan ti biktima ken suspek iti kallabes ket maipanggep ti daga.
Madlaw a nakaro ti gura ti suspek iti biktima gapu ti brutal a panangpatay na ken ni Felix.
Dagus a nagtalapwagaw ti suspek kalpasan ti krimen ken iti agdama ket an-anupen dagiti otoridad.
