LAOAG CITY – Nagballigi dagiti otoridad a nangtiliw ti maysa a mannalon iti naiyuswat a drug buy-bust operation idiay Barangay Ester, Vintar, Ilocos Norte.
Nabigbig daytoy a ni Michael Agron, agtawen iti 44, naasawaan ken residente iti Barangay Mabanbanag ti nasao nga ili.
Natiliw ni Agron kalpasan a naglako iti maysa a sachet a naglaon ti maipagarop a shabu nga agbalor iti 500 a pisos babaen ti maysa a pulis a nagpammaranga poseur buyer.
Malaksid ti daytoy, nakaala pay dagiti otoridad iti posisyon ni Agran ti maysa a sachet a naglaon ti maipagarop a shabu ken lighter.
Mainaig ti daytoy, inbatad ni Police Chief Inspector Michael Padamada, ti chief of police iti ili a Vintar a ni Agran ket dati a drug surrenderer ngem nagsubli met laeng iti illegal nga aktibidad na.
Innayon na a malaksid ti illegal nga aktibidad na ket naamoan da pay a kabkabilen na ti asawa na a masikog.
