LAOAG CITY – Natiliw ti maysa a menor de edad kalpasan a sinerrek na ti maysa a pagtaengan idiay Barangay 9, Balintawak St. ditoy ciudad ti Laoag.
Ti nasao a menor de edad ket residente idiay Barangay Teppeng, Sinait iti probinsya ti Ilocos Sur, ken ti biktima na ket ni Evelyn Corpuz, agtawen ti 62, naasawaaan, agtagikua ti maysa a travel agency.
Segun iti imbestigasyon, ti opisina ni Corpuz ket asideg laeng iti pagtaengan na rason a nangeg na kalimbatog rason a simrek iti balay na ket ditoy a nakita na ti menor de edad nga agsuksukimat kadagiti kagamitan na.
Gapo iti daytoy, dagus a timmawag iti PNP ken balligi a narekobre iti ikot ti suspek ti balitok a kwintas nga agbalor ti 2,500 a pisos.
Basar ti PNP, am-amoen da pay laeng no kasano a nakadanon ti menor de edad ditoy ciudad manipud idiay Ilocos Sur.
Saan da met pay a masinunuo no anya ti trabaho wenno gagem na iti panagturong na ditoy probinsya gapo ta awan ti kabagyan wenno pagayam na ditoy Ilocos Norte.
Naamoan a kalpasan a natiliw ti menor de edad ket nagturong ti ama na ditoy probinsya.
