LAOAG CITY – Umabot iti maysa a milyon a pisos ti agur-uray a premio ti mangabak iti Tan-ok ni Ilocano Festival of Festivals.
Daytoy ti kinumpirmaran ni Mr. Aianree Raquel, ti Provincial Tourism Officer.
Segun kenkuana, adda ti walo a mangabak iti nasao a pasalip no sadino adda ti 1st prize, 2nd prize, 3rd prize ken 5 runner ups manipod iti Provincial Government of Ilocos Norte, Gov. Matthew Marcos Manotoc ken ni Ilocos Norte 2nd District Representative Angelo Marcos Barba.
Inbatadna nga agpapada a 20 a porsiento ti criteria for judging a nakasentro iti story, performance, choreography, production design ken originality.
Kunana a dagiti agbalin a judges ket maysa a famous festival director ti Sinulog Festival, manipod kadagiti national dance companies pakairamanan dagiti dance experts ti Pilipinas.
Inlawlawagna nga adda manen ti naidumduma nga ipabuya dagiti performers ita a tawen manipod kadagiti 21 nga ili ken dua a siudad banag nga isu ti padpadaanan dagiti naruay nga umili a mapan agbuya.
Mainaig iti daytoy, naragsak nga inpakaammo ti Provincial Tourism Officer a ni Senador Imee Marcos ti kangrunaan a sangaili iti Tan-ok ni Ilocano Festival of Festivals.
Innayonna a dagiti mapan agbuya ket masapol nga ipakitada ti ticket-da a libre tapno mapalubusan dagitoy a makastrek para iti naan-anay a pannakaipatungpal ti seguridad.
Maipalagip a nag-champion iti ili ti Currimao iti napalabas a tawen no sadino nakaawatda ti maysa a milyon a pisos a premio manipod ken ni Presidente Ferdinand Bongbong Marcos Jr.
Kabayatanna, maisayangkat ti naindaklan nga atibidad ti probinsia iti Ferdinand Edralin Marcos Stadium ditoy siudad ti Laoag a manamnama nga atendaran ti rinibu a tattao.
