LAOAG CITY – Kinumpirmaran ni Police Chief Inspector Roldan Suitos, ti chief of police iti Sarrat, Ilocos Norte nga adda ti natiliw da a motorista a nagikot ti paltog bayat ti panangiyuswat da ti comelec checkpoint idi rabii.
Binigbig na daytoy a ni Sherwin Rinen, agtawen ti 26, baro ken residente iti Barangay Albano iti ili ti Dingras.
Inbatad ni Suitos a naala da iti ikot ni Rinen ti maysa a kalibre 45 a paltog ken maysa a magazine nga addaan iti innem a bala.
Segun ken ni Suitos, ginandat ni Rinen ti mangliklik ngem naladawen gapu ta nakastreken iti checkpoint area.
Inbatad ti opisyal bayat ti panangsaludsud da no adda ti lisensya ni Rinen ket nasirpat da ti kasla paltog.
Inpetteng ni Suitos nga awan ti permit to carry outside residence manipod iti Comelec a naipakita ni Renin ken nakainom pay daytoy ti nasanger.
Atapen ni Suitos a ti suspek ket al-alaen dagiti tattao a mayat a pagserbian na gapu ta awan ti naibaga na a trabaho na.
