LAOAG CITY – Kinumpiramaran ni Senior Inspector Edisson Reyes, ti firemarshall iti Bureau of Fire Protection (BFP) iti ili ti Bacarra ti pannakauram ti maysa a lugan iti paset ti Barangay 20, Pulangi iti nasao nga ili.
Inbatad na nga iti panagresponde da ket ditoy a nakita da ti maur-uram a multicab a kukua ti ITS Company nga agtartarimaan wenno agiplasplastar iti Convergence fiber Internet iti nasao a barangay.
Inlawlawag ni Reyes a basar iti pannakisarsarita da iti driver ti multicab a ni Joey Ignacio, addan ti panagperdi ti lugan iti kallabes.
Kuna na a bayat iti panagtartaray ti lugan ket adda ti nagbaniit iti siruk na a sinaruno ti asok kalpasan na ket kellaat a nagapoy iti makina wenno batog iti tugaw ti driver agingga a naan-anay a nauram.
Nupay kasta, nagasat gapu ta nakarwar nga immuna dagiti nakalugan sakbay a nagapuy ti lugan ken adda dagiti balbalay iti asideg ngem saanda a nairaman.
Mainaig iti daytoy, kuna ni Reyes a mabalin a mechanical error ti napasamak no sadinno a possible a napasamak ti Short circuit kadagiti wirings na ken saan a nasayaat ti pannakatarimaan na. Innayon na a saanda pay a maibaga no mano amin ti balor dagiti nadadael ngem ti inisyal a naibaga dagiti maseknan ket umab-abot iti 300 a ribo a pisos.
