LAOAG CITY – Inbatad ni Vice Mayor Vicentito Lazo nga adda ti naawat na nga impormasyon nga adda ti maysa a nangato nga opisyal ti gobierno ditoy ciudad ti Laoag a maipagarop a nangted ti sag-1,100 a pisos kadagiti presidente ti Tricycle Operators and Drivers’ Association (TODA) tapno saan da a mapan agatendar iti public hearing.
Matratar koma idi biernes iti nasao a public hearing ti pannakaipababa ti multa no aglabsing iti linteg trapiko no sadinno a manipod iti 1000 a pisos ket mapagbalin a 500 a pisos, ngem saan a natuloy gapu ta bassit dagiti napan nagatendar.
Gapu iti napasamak ket kiniddaw ni Lazo iti chairman ti Committee on Transportation ditoy ciudad a suratan da dagiti miembro ti TODA tapno mapan da agatendar iti maiyuswat a public hearing intono Nobyembre 27 iti oras ti alas-8:30 iti bigat.
Iti baet daytoy, inpetteng ti bise mayor a no saan latta a mapan agatendar dagiti maseknan ket saan a pukaw iti konseho ditoy ciudad ti Laoag ngem ketdi kayat da laeng a makaala ti inputs kadakuada.
Innayon na a no public hearing ket saan a kasapulan ti quorum isut gapuna a mapan man agatendar wenno saan dagiti maseknan ket maituloy latta daytoy.
