LAOAG CITY – Natakawan ti maysa a pagtaengan iti Barangay 3, San Andres II iti ili ti Bacarra.
Ti akinkukua ti balay ket ni Joseph Sales Palafox, agtawen ti 72, awanan asawa, retired Philippine Army ken residente iti nasao a barangay.
Basar iti Bacarra Municipal Police Station, agarup alas otso ti bigat, nakita ti biktima dagiti suspek a simrek iti pagtaenganna babaen ti panangdadaelda iti fixed glass window.
Gapu iti daytoy, insigida a nagkiddaw ti tulong ti biktima kadagiti barangay officials no sadinno a nakitada dagiti suspek nga adda iti uneg ti pagtaengan ti biktima nga insigida met a tiniliwda dagitoy.
Mainaig iti daytoy, dagiti suspek ket agtawen ti 20, awanan asawa ken residente ti Barangay 28, Cabusligan iti ili ti Bacarra ken maysa a lalaki a menor de edad a residente ti Barangay Pulangi iti ili ti Bacarra.
Naammoan a dagiti natakaw ket 1 a male wristwatch, Seiko 5 nga agbalor ti P17,000.00, 1 a backpack nga agmaris ti blue ken nangisit a naglaon ti 3 a pedaso ti nangisit a medyas, 1 a bassit a bag, 1 a male wallet ken 2 a female wallets.
Iti agdama, manarimaan ti pannakaisagana dagiti dokumento a maipila a kaso kontra iti suspek nga agtawen ti 20 idinto a ti menor de edad ket naiyendorso iti Municipal Social Welfare Development Office iti ili ti Bacarra.
