LAOAG CITY – Natakawan ti maysa a pagtaengan iti Brgy. 40, Balatong ditoy siudad ti Laoag.
Nabigbig ti biktima a ni Lolita Sagadraca, agtawen iti 73 ken awanan asawa idinto a nabigbig met ti suspek a ni RJ Morales Ronduen wenno ad-adda nga am-ammo iti awag a “Gori,” adda iti umno a tawen, awanan asawa nga agpada dagitoy a residente iti nasao a barangay.
Basar iti Laoag City Police Station, napasamak ti insidente iti oras ti 1:15 ti parbangon idi Nobiembre 7 no sadinno a kabayatan a matmaturog ti biktima iti salas ti pagtaenganda ket nariparna ti suspek nga adda ti iggemna a flashlight nga agturong kenkuana.
Kinomprontar ti biktima ti suspek ngem saan daytoy a simmungbat isu a nagpukkaw isuna ken nagkiddaw ti tulong.
Gapu iti daytoy, dagus a naglibas ti suspek ken rimmuar isuna iti nakalukat a ridaw iti kusina.
Naammoan a dagiti natakaw a ramit ti biktima ket maysa a relo nga agbalor ti uppat a ribu a pisos, maysa a kwentas nga agbalor ti 48 a ribu a pisos a naidulin dagitoy iti bassit a drawer ken kuarta nga agbalor ti lima a ribu a pisos pakairamanan ti dua nga US Dollar a kuartana a naidulin iti wallet ti biktima.
Kabayatanna, narekobre ti maysa a nalabbaga a bado ti suspek iti pagtaengan ti biktima no sadinno a kinumpirmaran dagiti saksi nga inusar ti suspek ti nasao a bado sakbay ti insidente.
Iti agdama, agtultuloy ti follow up ken hot pursuit operation kontra iti suspek.
