LAOAG CITY – Nakita ti maysa a turista manipud idiay Metro Manila ngem tubo daytoy iti ili ti Bangui ti maysa a pakete a naglaon ti maipagarup a shabu iti kabaybayan iti Barangay Pangil ili ti Currimao.
Segun ken ni P/Capt. Melvin Soriano, Hepe ti Currimao Municipal Police Station, ti nasao a pakete ket naikabil iti silver foil ken transparent plastic no sadinno nga adda ti ladawan ti durian ken adda dagiti nakasurat a Chinese characters.
Inbatadna nga apaman a mapan agdigus ti nasao a turista iti baybay ket nakitana ti pakete nga agtatapaw iti narabaw a paset iti kabaybayan ti Pangil Rock Formation.
Kunana nga iti damo ket nagamak ken nagdudua pay ti turista gapu ta inpagarupna a ti nasao a pakete ket posible a naglaon ti bomba.
Inlawlawagna a basar iti inwayatda nga imbestigasion, ti nakita ti turista a pakete ket kapadana dagiti pakete a naglaon ti kontrabando a naalaw dagiti mangngalap iti kabaybayan idiay probinsia ti Ilocos Sur, La Union ken Pangasinan.
Mainaig iti daytoy, inpakaammo ni P/Capt. Soriano a basar iti Philippine Drug Enforcement Agency – Ilocos Norte nga agdagsen ti maipagarup a shabu ti sumurok-kumurang maysa a kilo ken agbalor daytoy ti 6.8 milyon a pisos.
Kabayatanna, kiniddawna kadagiti residente nga ipakaammoda nga insigida kadakuada no adda ti makitada a kapada a pakete a naglaon ti droga.
Immuna iti daytoy, adda dagiti naalaw dagiti sumagmamano a mangngalap kadagiti kaparanget a probinsia a naruay a pakete a naglaon ti shabu nga agbalor ti minilyon ken binilyon a pisos.
