LAOAG CITY – Nagballigi ti Philippine National Police babaen ti panangidaulo ni Police Lt. Col. Andew Rabang, ti chief of police ditoy ciudad ti Laoag iti inyuswat da a search operation iti Barangay 1 ditoy ciudad.
Nabigbig ti subject ti operasyon a ni Mr. Dixon Navarro Lorenzo alyas Dugsol, agtawen ti 45, awanan asawa, electricial ken residente metlaeng iti nadakamat a barangay.
Ti search warrant ket inparuk-at ni Executive Judge Dinah Myrtle M. Pacquing iti Regional Trial Court Branch 11 ditoy ciudad ti Laoag gapu iti panagsalungasing iti Republic Act 10591 wenno ti Comprehensive Firearms and Ammunition Regulation Act ken ti Republic Act 9165 wenno Comprehensive Dangerous Drugs Act of 2002.
Iti panagsukimat dagiti otoridad iti balay ni Lorenzo ket nakakumpiskar da ti maysa a caliber 38 a paltog nga addaan ti uppat a bala, maysa nga open transparent plastic sachet a naglaon ti 12 a pedaso ti heat sealed plastic sachet a naglaon ti maipagarop a shabu; dua nga heat sealed plastic a naglaon ti maatap a shabu ken maysa a dakkel nga heat sealed transparent plastic sachet a naglaon metlaeng ti mapapati a shabu a dagitoy ket agdagsen amin iti 7.7 grams a mapatta-patta nga agbalor ti P52,360.00
Naglikudan ti suspek a kukua na dagiti naala nga ebidensya kontra kenkuana.
Maisagsaganan ti reklamo a panagsalungasing iti Republic Act 10591 wenno ti Comprehensive Firearms and Ammunition Regulation Act ken ti Republic Act 9165 wenno Comprehensive Dangerous Drugs Act of 2002 kontra iti nasao a suspek.
