LAOAG CITY – Maluksaw ni Mrs. Gloria Delarmente iti Barangay Sucsuquen iti ili ti Piddig iti maipagarop a panangipalubos ni Barangay Chairman Joseph Salvador a maited ti kwarta nga inted ti lokal a gobierno iti nagpabigbig a kabagyan ti akin-kukua a mismo ti pagtaengan a pagnanaedan dagitoy.
Segun kenni Delarmente, gapo iti bagyo Egay ket naminpinsan a nalikkab ti galba ti pagtaengan rason a naipaayan da ti 28 a ribo a pisos manipud iti lokal a gobierno para iti pagpatarimaan daytoy.
Inlawlawag na a kellaat lattan a simmangpet ti maysa a nagpabigbig a kabagyan ti agtagikua iti pagtaengan ken nagsasarita da iti barangay hall.
Inbatad na nga adda ti pinapirmaan da kenkuana ken maipagarop nga inbaga ti kapitan nga ited da ti kwarta iti maseknan ken maatap pay a nakaunget gapo ta nakissayan ti lima ribo a pisos ti 28,000 ngem inpetteng na nga ingatang da ti bagas ken dadduma a kasapulan da daytoy.
Mainaig iti daytoy, inpetteng na a saan kuma a kastoy ti inaramid ti kapitan ken nagbingay da kuma lattan tapno ada ti pagpatarimaan da iti pagtaengan nangruna ket awan a pulos pay ti galba na.
Innayon na a nagnaed da iti nadakamat a pagtaengan babaen iti panangipalubos dagiti agasawa a baket ken lakay idi sibibiag da pay laeng.
Kabayatanna, inbatad na nga adda manen ti manamnama a maawat da a tulong ngem maipagarop a nabilin da nga ipatulod iti nadakamat a kabagyan.
