LAOAG CITY – Naduktalan ti maysa a parcel a naglaon ti maipagarup a napagango a bulong ken sabong ti marijuana iti maysa a parcel ti courier warehouse iti Vintar Road ditoy siudad ti Laoag.
Segun kenni PLTCOL Jonathan B Papay, Chief-Provincial Intelligence iti Ilocos Norte Police Provincial Office, basar ti inisyal nga imbestigasionda ket naipaima iti courier warehouse ditoy siudad ti nadakamat a parcel idi Marso 24.
Nabigbig ni PLtCol Papay a ti sender ti nasao a parcel nga addaan ti nagan nga alyas “Pancho” residente iti Batangas.
Inbatad ni PLtCol Papay nga apaman a naawat ti courier warehouse iti package ket sigudda a tinawagan ti receiver a nakaikabil a residente ditoy siudad.
Innayonna nga apaman a natawaganda ti receiver ti nasao a parcel tapno i-deliver daytoy ket naamuan a awan ti parcel nga i-norderna, isu ti rason a tinawaganda ti sender tapno maisubli ti nasao a package.
Idinto a natawaganda ti sender ti nasao a package ket inbatadna a saanna kinayat a maisubli daytoy ken kunana a bayadanna laeng daytoy babaen iti GCash nga agbalor ti P25.
Gapu iti daytoy, dineklara ti courier service ti nasao a package a kas delivered ken no sadinno ita nga aldaw ket nilukatanda ti package a naglaoan ti maipagarup a marijuana.
Iti agdama, agtul-tuloy a maiwayat ti naununeg nga imbestigasion.
